Gin-athag sang Dueñas Municipal Police Station nga wala sang may natabo nga hostage taking sa banwa sang Duenas.
Sa interview sang Bombo Radyo kay Police Captain Joy Melvin Dulce, Officer in Charge sang Dueñas Municipal Police Station, iya ginpahayag nga ang katapo sang Philippine Army ang nagpondo sang iya salakyan kag naguwa agud nga magpangihi, kon sa diin nagtawag man ini sa iya nga asawa gamit ang iya cellphone.
Suno kay Dulce, na-misinterpret ini sang mga pumuluyo sa palibot nga daw kaangay nga may naga-away bangud man sa ila nga tono sang pag-istoryahanay sang iya nga asawa.
Gin-athag man sang natungdan nga 50-100 meters ang kalayuon sang ila salakyan halin sa mga residente nga nag-report.
Nahibaluan nga nagtawag lamang ang katapo sang army sa iya nga partner agud nga magpahibalo nga indi na ini ka sarang magmaneho sang iya salakyan bangud nagalain ang iya nga pamatyagan.
