Nagapabilin nga matinlo ang record sang Cleveland Cavaliers matapos ang ikaanum nga sunod-sunod nga kadalag-an subong nga regular season sa NBA.
Nanguna sa Cavs si Darius Garland nga may 25 points kag Donovan Mitchell nga may 22 points sa 120-109 win batok sa pangayaw nga Orlando Magic.
Ang 6-0 nga record sang Cleveland sa pagbukas sang season ang nagatupong na sa pinakamaayo nga imbukada nga performance sang franchise sang 2016-2017.
Ang kadalag-an sang Cavs kag bag-o sini nga coach nga si Kenny Atkinson amo naman ang naghatag sa Magic sang ikaduha nga sunod-sunod nga kalutusan.
Nagpanguna sa Orlando si Jalen Suggs nga may career-high 28 points, Franz Wagner kag Tristan da Silva nga may tag-17 kag si Moritz Wagner nga may 14.
Wala nakaupod sa Magic ang All-Star forward nga si Paolo Banchero bangud sa iya injury sa hampang batok sa Chicago Bulls. Natalana ini nga i-evaluate liwat sa masunod nga sinemana kag indi pa sigurado kun san-o makabalik.
Wala man sa Magic si Goga Bitadze bangud sa tendon strain sa wala nga tiil kag si Wendell Carter Jr. bangud naman sa right knee tendinitis.
8:00 subong nga aga ang masunod nga hampang sang Cleveland sa Eastern Conference batok sa Milwaukee Bucks (1-4).
