Gintulod sang anay presidente sang Integrated Bar of the Philippines (IBP) nga dapat magpares na ang executive branch sa Commission on Human Rights (CHR) agud magbalay sang kaso batok kay former President Rodrigo Duterte.
Suno kay former IBP president Domingo Cayosa nga nagserbe sang 2019-2022, maathag na ang mga ginpang-ako ni Duterte sa Senate hearing gani dapat nga maghulag na ang kapulisan, National Bureau of Investigation (NBI), CHR, kag ang Department of Justice (DOJ) para sa kaso.
Ang CHR isa ka independent constitutional commission kag wala sang gahum nga mag-prosecute sang mga kaso apang maka-document ini sang cases kag maka-rekomendar sang kaso.
Suno kay Cayosa, mahimo magamit ang mga testimoniya ni Duterte para mag-file sang civil damages ukon criminal cases.
Ginpahayag man sini nga indi na dapat maghulat ang law enforcement agencies kag CHR sa masunod nga hulag sang mga mamalidha bangud indi man sila fiscal ukon prosecutor.
“Hindi sila fiscal, prosecutor… They can study but ‘yung kapulisan, NBI CHR, DOJ [ang dapat] mag-tulong to build up a case,” pahayag sini nga nagapatuhoy sa mga miyembro sang Kongreso.
Una naman nga nagpanawagan si Senate President Francis “Chiz” Escudero sa mga pamilya sang alleged extrajudicial killings victims nga mag-file sang kaso batok kay Duterte, samtang may duha ka iban pa nga congressional leaders nga nagapati nga pwede ireklamo ang former president sang crimes against humanity sa Philippine court.
Matandaan nga nagpahayag naman ang PNP nga gina-imbestigaran sini ang impormasyon nga may mga pulis nga kabahin sang Davao Death Squads. Ini matapos ginpangtudlo ni Duterte ang anay chiefs of police bilang mga commander sang sini nga ‘death squad’.
Si Sen. Ronald “Bato” Dela Rosa nga anay Davao City police chief kag former PNP chief ang nagdepensa naman nga nagalahog lamang si Duterte sang ginhambal niya ini sa Senado.#
