Ginakonsiderar sang Iloilo City Government ang pagpaidalom sa public-private partnership (PPP) para sa Bus Rapid Transit (BRT) system.
Sa interview sang Bombo Radyo kay Atty. David Garcia, Vice Chairman sang PPP Committee, iya ginpahayag nga pondohan sang Swedish government ang feasibility study sang proyekto.
Suno kay Garcia, ang feasibility study ang magaserbe nga basehan para sa solicited proposals para sa mga investors.
Ang ini nga pagtuon suno sa natungdan ang maga-assess sa sector sang pampubliko nga transportasyon agud mag-complement ang BRT kag ang jeepney system sa syudad.
Una naman nga nagpirma si acting Mayor Jeffrey Ganzon sang memorandum of agreement kaupod ang Swedfund – ang development finance institution sang Swedish government para sa 6-million Swedish krona ukon P33 million on behalf sang Metro Iloilo-Guimaras Economic Development Council.
Sakop sang nasambit nga grant ang pagpondo sang comprehensive feasibility study, technical assessments, financial projections, kag environmental and social impact analysis.
Gin-imbitaran naman ang Sweden, Spain, Thailand, kag France nga magpasa sang bids para sa proyekto.
Nagpabutyag naman sang interes ang Swedish government nga magbulig kun kinahanglanon pa sang dugang nga pondo agud matapos ang pagtuon.
