Nabaylohan sang kasubo ang kalipayan sang isa ka prostitute matapos nga ginaalegar ginkawatan ini sang iya ka-transakyon sa La Paz, Iloilo City.
Sa interview sang Bombo Radyo kay Police Major Tranquilino Querubin, hepe sang Iloilo City Police Station 2, iya ginpahayag nga ginreklamo sang biktima nga si Alyas “Inday” sa ila talatapan ang naka-transaksyon sini gamit ang social media.
Suno kay Querubin, nag-meet-up sila sang iya customer sa isa ka lodging house sa Iloilo City, kon sa diin, ila nakasugtan nga sa balor P2,500, baylohan ini sang temporaryo nga kalipayan.
Ginpahayag man sang hepe nga sang natapos sila sa una nga round, naghingyo pagid ang customer ni alyas Inday nga magdugang sang isa pagid ka round.
Naglab-ot naman sa P9,000 ang offer sang customer kag nagpasugot si alyas Inday.
Sang nagguwa na sila duha sa lodging house, sakay sa motorsiklo, nagpadulong sila sa isa ka Automated Teller Machine ukon ATM sa Iloilo City Proper bangud ma-withdraw kontani ang customer ni Inday.
Sang yara na sila sa atubang sang ATM, ginhulam sang customer ang cellphone ni Inday kag sang nauyatan na sang customer ang cellphone, hinali lang nga ginpadalagan sini ang iya motorsiklo.
Daw gintakloban sang langit ang nabatyagan ni alyas Inday sang gintaban sang customer sini, indi lang ang iya kalipayan kundi pati ang iya cellphone.
