Indi pa sa gihapon makumpirma sang Tigbauan Municipal Police Station kon sin-o ang nagapanag-iya sang armas nga gingamit sang suspek sa pagluthang-patay sa anay punong barangay sang San Rafael, Tigbauan, Iloilo.
Ang biktima amo si Joevani Triste, residente sang nasambit nga lugar.
Samtang, ang suspek amo si John Castro Jr.
Sa interview sang Bombo Radyo kay Police Captain Alfred Mansoy, hepe sang Tigbauan Municipal Police Station, iya ginpahayag nga may duha ka armas ang suspek nga nakarehistro mismo sa pangalan sini.
Ini amo ang 9mm kag ang 45 caliber.
Suno kay Mansoy, indi pa matumod kon ang 45 caliber ang gingamit ni Castro sa pagpangluthang sa anay punong barangay.
Ginpahayag man sini nga yara sa gihapon ang nasambit nga pusil sa paghinakop sang suspek kag wala pa narekober.
Sa subong, ginahulat pa sang talatapan ang mga ebidensya nga inog-submit ilabi na ang resulta sang forensic evidence.
Gin-athag man sang hepe nga wala sa gihapon sang ‘warrant of arrest’ ang suspek bangud yara pa sa Iloilo Prosecutor’s Office ang ebidensya.
Nahibaluan nga una na nga naggwa sa imbestigasyon nga posible konektado ang suspek sa isa ka maimpluwensiya nga tawo.
