Naghatag sang impormasyon ang anak sang principal suspect sa kaso sang pagkidnap sa American national nga si Elliot Onil Eastman sa Sibuco, Zamboanga del Norte.
Suno kay Brig. Gen. Jean Fajardo, spokesperson sang Philippine National Police (PNP), ini nga mga impormasyon ang nagalakip sang detalye halin sang tion nga ginkuha gid mismo si Eastman sa balay sang iya mga ugangan sa Barangay Población tubtub nga ginsakay ini sa motorized boat.
Ini nga mga detalye ang subject pa para sa verification sang PNP kag Armed Forces of the Philippines (AFP).
Lakip sa ginbuyagyag sang anak sang principal suspect amo nga ang sakayan nga gingamit sa pagdala kay Eastman ang ginpintahan liwat para malikawan nga ma-detect.
Indi klaro subong kun buhi ukon patay na si Eastman halin sang ginkidnap ini sang Oktubre 17.
Lakip sa ginalantaw nga motibo sa kidnapping amo ang ransom apang may iban pa gid nga ginatun-an nga mga posibilidad.
Nahibaluan nga may kidnapping and serious illegal detention complaints na nga na-file batok sa anum ka mga suspek. Tatlo sa ila ang yara sa kustodiya sang pulis samtang at large naman ang principal suspect.
Si Eastman nga isa man ka vlogger ang kasado sa isa ka Pinay kag lima ka bulan na nga yara sa Sibuco antes natabo ang insidente.
Padayon man ang pag-trabaho sang US Embassy kaupod sa local authorities sa pagpangita kay Eastman ilabi na bangud una na nagguwa ang impormasyon nga natiruhan ini antes dalayon nadala sang mga armado nga kalalakinhan.
