Nagdepensa ang G. Uy Construction nga amo ang kontrakor sang drainage system project sa JM Basa Street, City Proper nga ginahalongan nila ang mga ‘existing lines’ nga nasakopan sang project sa amo nga dalan.
Sa interview sang Bombo Radyo kay Alvin Uy, Representative sang G. Uy Construction, iya ginpahayag nga bisan ang mga nagapanag-iya sang mga nakalubong nga cable lines ang indi tanto makatumod kon sa diin ayon nakalubong ang ila linya.
Suno kay Uy, isa ini sa mga pagpanghangkat nga ila nakit-an sa paghuman sang drainage.
Ginpahayag man sini nga ginahulat man sang ila kompanya ang mga tikang nga mahimo mabulig sang city government ilabi na nga may mga proyekto man nga nadalasa, lakip na diri ang pila ka street light sa JM Basa.
Una na nga ginpahayag sang Department of Information and Communications Technology Regional Office VI (DICT) nga apektado ang ila serbisyo sa mga ahensya sang gobyerno bangud sa drainage system project.
