Naubos na ang unod sang Quick Response Fund sang national government bangud sa sunod-sunod nga mga bagyo nga nagsulod sa Pilipinas kag nagbilin sang dalagku nga mga halit.
Ginpahayag ini ni President Ferdinand ”Bongbong” Marcos Jr. sa iya speech sa Legazpi City, Albay sang nagpanagtag sang assistance sa farmers, fisherfolk kag mga pamilya nga naapektuhan ni Severe Tropical Storm ‘Kristine’.
Suno kay Marcos, ginkinahanglan pa nga magpain sang lain na naman nga pondo para nga may sulod na naman ang QRF kag mahatag sa local governments kag sa mga nagakinahanglan.
”Ang QRF natin ang katotohanan diyan dahil sa dami ng bagyo ay naubos na. Kaya’t ang ginawa natin ay nagtabi ulit tayo ng pondo para mabigyan ulit, malagyan na naman natin ng laman ang QRF natin para sa mga local governments at sa inyong mga pangangailangan,” ang kabahin sang speech.
Sa idalom sang General Appropriations Act of 2024, may pondo ang national government sa idalom sang National Disaster Risk Reduction and Management Fund (NDRRMF) kag Quick Response Fund (QRF) agud magpatigayon sang disaster relief operations.
May P7.925 billion sa QRF sa idalom sang 2024 General Appropriations Act (GAA) kag sa sini nga kantidad, P1 billion ang ginpain sa Department of Agriculture – Office of the Secretary.
Una na nga ginpahayag ni Finance Secretary Ralph Recto nga lakip sa additional funds nga mahimo ma-tap sang Department of Finance amo ang unprogrammed funds, ang $500 million standby credit line, ang Rapid Response Option (RRO) facility, contingent emergency response components halin sa World Bank, kag post-disaster standby financing halin sa Japan.
Sa pihak nga bahin, nagpaathag naman ang Department of Budget and Management nga ang buot silingon ni Marcos sa iya speech amo ang QRF replenishment.
”Under the 2024 GAA, the existing NDRRMF balance can still be used to replenish agency QRF (when agency QRF reaches 50%) to fund the immediate needs of disaster-stricken localities,” pahayag sang DBM.
”But with the limited NDRRMF balance, the DBM is looking to tap other sources of funds to support the continued relief and rehabilitation of vulnerable areas,” dugang sang ahensya.#
