Isa ka daog na lang ang kinahanglan sang defending champions nga TNT Tropang Giga agud nga makuha liwat ang kampyonato sa PBA Governor’s Cup.
Abanse na sa serye ang team sa idalom ni Coach Chot Reyes, 3-2, matapos gintambakan ang Barangay Ginebra, 99-72,sa Game 5 sa best-of-seven finals sa Smart Araneta Coliseum.
Matapos gindomina ang una nga quarter, 26-20, nagpaulan ang TNT sang 30 points nga tuman ka layo sa 13 nga nahimo sang Gin Kings nga amo ang nagtapos sa first half sa score nga 56-33.
Nagdangat sa 36 ang pinakadaku nga abanse sang team sa second half, 84-48, matapos ang 4-pointer ni RR Pogoy sa ika-10 nga minuto sang fourth quarter.
Nagapati si Coach Reyens nga ang pagpabilin sang ila pagka-kalmado batok sa dalagku nga Ginebra stars kag Coach Tim Cone amo ang nagpadaog sa ila sa Game 5.
“I think that was the most important thing, for us not to panic and keep our heads around us so we could make good decisions. I think that’s number one. Number two was just our focus on our strength which was our strength the whole tournament long which was our defense,” suno kay Reyes.
Ang Best Import nga si Rondae Hollis-Jefferson ang nakahatag sang 16 points, 10 boards, three assists, kag block para sa TNT; samtang si Pogoy naman ang may 16 points nga gindugangan ni Calvin Oftana sang 15 points, eight rebounds, kag two assists.
Sa pihak nga bahin, may tag-13 puntos naman sanday Scottie Thompson kag LA Tenorio para sa Ginebra, samtang may 10 puntos naman si Stephen Holt.
Diri man sa Game 5 nakit-an ang isa sa worst performances sang three-time Best Import nga si Justin Brownlee nga may otso puntos nga malayo sa 34 puntos sini sa Game 4.
6 points ang nahimo sini sa first half antes ang dos puntos sa second half. Nagguwa ini sa game tatlo ka minutos ang nabilin sa third quarter kag wala na nagbalik.
Ini ang labing-una nga tion nga wala siya nakalab-ot sa double-figure scoring halin sang nagsulod siya sa PBA sang 2016 suno sa league chief statistician nga si Fidel Mangonon.
Matabo ang Game 6 sang Finals sa Biyernes.
Scores:
TNT 99 – Hollis-Jefferson 16, Pogoy 16, Oftana 15, Williams 11, Castro 10, Nambatac 7, Erram 7, Exciminiano 6, Khobuntin 4, Heruela 3, Aurin 2, Galinato 2, Payawal 0, Ebona 0, Varilla 0.
Ginebra 72 – Thompson 13, Tenorio 13, Holt 10, Brownlee 8, Abarrientos 7, J.Aguilar 6, Cu 5, R. Aguilar 5, Pessumal 4, Ahanmisi 1, Pinto 0, Adamos 0.
Quarters : 26-20, 56-33, 79-48, 99-72.
