Kulang sa tawo apang nasarangan sang Denver Nuggets nga mapatilaw kay Shai Gilgeous-Alexander kag sa Oklahoma City Thunder ang una nga mapait nga kapaslawan subong nga regular season sa National Basketball Association (NBA).
Nanguna sa 124-122 win sang former champions ang triple-double sang three-time MVP nga si Nikola Jokic nga may 23 points, 20 rebounds, kag 16 assists nga amo ang nagtapos sang perpekto nga record sang Thunder (7-1).
Ini man ang ikaapat na nga triple-double sang 29-anyos nga Serbian superstar subong nga season.
Naka-skor naman si Russell Westbrook sang 29 points, may tag-24 puntos sanday Michael Porter Jr. kag Christian Braun, samtang may 10 points kag three blocks naman si Peyton Watson lakip na ang game-sealing block isa ka segundo ang nabilin sa game.
Ini nga kadalag-an amo man ang nagtapos sang four-game head-to-head losing streak sang Denver batok sa Oklahoma City.
Naghampang sanday Jokic nga wala si Jamal Murray (concussion protocol) sa ikatatlo na nga tion, kag wala man si Aaron Gordon nga indi man makahampang sa masunod nga sinemana bangud sa right calf strain.
Sa Thunder naman, may 29 points, 10 rebounds kag nine assists si Jalen Williams samtang si Gilgeous-Alexander ang naka-skor sang 28 puntos.
Patas na subong ang Oklahoma City sa Suns kag Warriors sa number 1 spot sa West nga may 7-1 record samtang nagsaka naman ang Denver sa 5-3.#
