Ginakibang ang pila sa mga residente sa Barangay Lantangan (Gigantes Sur), Carles, Iloilo pila ka semana matapos natabo ang pagpatay sa mag-asawa nga senior citizen sa amo nga island barangay.
Kun balikan, ang mga biktima amo sanday Violeta Bolohabo, 71, kag Jesus Bolohabo, 75, nga gintiro sang nagapauli na ang mga ini halin sa gintambungan nga kahiwatan sa plaza.
Ang suspek naman amo si Wenrey Belasa, 31, residente sang Brgy. Bayuyan, Estancia, Iloilo, nga nadakpan naman sang mga pulis sa hot pursuit operation.
Una na nagguwa ang impormasyon nga posible naangot sa kaakig kag pagtimalos ang insidente bangud sa pagpangduha-duha nga mga manughiwit ang mga biktima.
Sa interview sang Bombo Radyo kay alias Jen nga nagpakilala nga hinablos sang mga biktima, ginpahayag sini nga indi gihapon mapahamtang ang ila pamilya sa ila nga safety apisar nga napreso na ang suspek.
Suno sa tag-reklamo, may mga nakit-an sila nga indi kilala nga mga tawo sa ila palibot kag nagakahangawa nga basi kun mabutang sa alang-alang ang ila nga seguridad sa island barangay.
Ginahingyo sang pamilya nga kuntani hugot ang inspection sa ila lugar ilabi na bangud may mga turista man nga nagasulod sa ila apang indi man ma-identify tanan.
Lakip man sa gindangop sini sa Bombo Radyo amo ang reklamo batok sa ila punong barangay.
Suno kay alias Jen, indi ma-cater ang ila nga concern bangud wala ang opisyal sa barangay hall kag yara ini nagatinir sa ila balay sa Estancia kag mga barangay kagawad lang ang naga-atubang sa ila pamilya.
Ginpalab-ot ini sang Bombo Radyo kay Mayor Siegfredo Betita sang Carles.
Pahayag sang alkalde, posible nga may iban man nga concerns nga ginahikot ang punong barangay bilang ABC president rason nga wala dayon naatubang ang reklamo sang pamilya.
Kaangot sa seguridad, ginpaathag man sang alkalde nga sa port of origin pa lamang ukon Bancal port, nagalista na sang pangalan ang mga turista. Ginpahayag man sini nga maga-istorya sila dugang sang barangay official kaangot diri.#
