Ginadumdom subong nga adlaw sang Nobyembre 8, ang ika-11 nga anibersaryo sang Super Typhoon Yolanda nga nagkuha sang linibo ka mga kabuhi sang 2013 sang ini ang nagsalakay sa Pilipinas.
Sa interview sang Bombo Radyo kay Dr. Raul Banias, Provincial Administrator sang Iloilo Province, iya ginpahayag nga sa bahin sang Iloilo, may 217 ka mga indibidwal ang napatay bangud sa Bagyo Yolanda.
Suno kay Banias, sa amo nga tion, na-record sang Iloilo Provincial Disaster Risk Reduction and Management Council (PDRRMC) ang 92,345 ka mga balay nga totally damaged, samtang masobra 83,000 naman ang partially damaged nga mga balay.
Nagapati man ang natungdan nga sang naglaslas ang Bagyo Yolanda sa probinsya, nakulangan sang pagpanghanda ang Iloilo Provincial Government rason nga ginatos gid sang kabuhi ang nadula.
Ini ang nagtulod man sa Iloilo Provincial Government agud nga himuon nga priority ang disaster preparedness kon sa diin, naghatag sang investment para sa man power, assets, kag disaster response.
Ginpahayag man sini nga sa subong, preparado na gid ang probinsya sa tion sang mabaskog nga kalamidad kaangay na lamang sang Super Typhoon Yolanda.
