Nagpangayo sang pasaylo ang suspek nga nagtiro-patay sa anay punong barangay sang Brgy. San Rafael, Tigbauan, Iloilo.
Ini kadungan man sa adlaw sang lubong sang biktima.
Ang biktima sa insidente amo si Joevani Triste, residente sang nasambit nga lugar; samtang ang suspek naman amo si John Castro Jr.
Sa interview sang Bombo Radyo kay John Castro, suspek, iya ginpanindugan nga indi gid sini luyag ang natabo sa tunga nila sang anay punong barangay.
Suno kay Castro, indi gid sini kagustohan ang natabo kag nagdepensa lamang siya sang iya kaugalingon kasunod sang paghingabot sa iya nga kabuhi.
Gintuad man sang natungdan nga ang nasukbit sini nga pusil ang ginapanag-iyahan sang iya ginaubrahan.
Ginpahayag man sini nga ginagamit niya ang pusil sang siya ang anay security kon sa diin, nagabantay siya sa isa ka balay-ilimnan sa amo man nga banwa.
Gin-ako man sang natungdan nga indi niya luyag ang natabo nga insidente bangud pila na siya ka tuig nga nagalikaw sa pagpanghingabot sa iya sang anay punong barangay.
Ginklaro man ni Castro nga indi siya myembro sang ano man nga grupo nga ginaangot sa iya.
Nagapabilin naman nga yara pa sa Iloilo Prosecutor’s Office ang ebidensya, rason nga wala sa gihapon sang ‘warrant of arrest’ si Castro.
