Madinalag-on nga nadepensahan sang TNT Tropang Giga ang ila nga korona sa Philippine Basketball Association (PBA) Governors’ Cup.
Ginlutos sini ang Barangay Ginebra sa Game 6, 95-85, sa Araneta Coliseum sa Quezon City sa atubang sang masobra 14,600 fans, Nobyembre 8.
Ini man ang nagamarka sang ika-10 nga PBA title sang squad sa idalom ni Manny V. Pangilinan.
Sa pagtakop sang hampang, gindayaw man ni Coach Chot Reyes ang Ginebra sa pagpanguna ni Coach Tim Cone bangud sa masandukot nga serye kun sa diin una nakuha sang Tropang Giga ang kadalag-an sa una kag ikaduha nga game, nagbalos ang Gin Kings sa 3rd kag 4th games, apang nagbalos liwat ang TNT sa Game 5 kag gintapos sa Game 6.
Nanguna sa champions ang Best Import awardee nga si Rondae Hollis-Jefferson nga may 31 points, 16 rebounds, eight assists, kag two steals.
Sa Gin Kings naman, nangin impresibo ang PBA rookie nga si RJ Abarrientos nga may career-high nga 31 points samtang nalimitahan naman sa 16 points, six rebounds, four assists, kag one steal ang three-time Best Import nga si Justin Brownlee.
Ginhingadlan nga Finals MVP ang 38-anyos nga TNT veteran guard nga si Jayson Castro ukon si “The Blur” nga naka-13 points, six assists kag two rebounds sa 27 minutos sini nga hampang sa Game 6.
Three-time Finals MVP na si Castro sa iya bug-os nga karera sa PBA apang ini ang una nga bes nga nagdaog siya nga isahanon bangud sa nagligad, duha sila nga winner ni Jimmy Alapag sa TNT title wins sang 2011 Philippine Cup kag Commissioner’s Cup.
The Scores:
TNT 95 Hollis-Jefferson 31, Castro 13, Pogoy 13, Nambatac 12, Oftana 8, Khobuntin 7, Aurin 5, Williams 4, Erram 2, Exciminiano 0
GINEBRA 85 Abarrientos 31, Brownlee 16, Holt 12, Ahanmisi 9, J.Aguilar 8, Thompson 6, Cu 3, Mariano 0, Pinto 0
QUARTERS: 21-16, 42-43, 63-74, 95-85
