Ginaplano sang Iloilo City nga mag-export sang low density plastic waste paagi sa waste diversion program.
Sa interview sang Bombo Radyo kay Engineer Niel Ravena, head sang Iloilo City General Services Office (GSO), iya ginpahayag nga nagatinguha ang talatapan nga makuha ang mga plastic sa waste stream, kon sa diin, kalabanan sa ginakuha amo ang high value plastics.
Suno kay Ravena, may yara man sang mga plastic nga ‘low density’ ukon wala sang balor nga nagakabilin sa mga sanitary landfill.
Nagapangita man sang partners ang talatapan agud nga matutokan ang mga low density plastic waste bangud masami ini nagakadto sa bodies of water ukon katubigan.
Ginalauman naman nga pagabaklon sang international partners sang GSO ang mga plastic waste sa balor nga P1 kada kilo.
Ang makuha nga plastic waste sa syudad ang pagagamiton naman sang kompanya sa ila coal processing plant.
