Ginalantaw sang pila ka enhinyero nga may posibilidad nga mangin mahuyang ang pila ka pier sang Ungka Flyover kon padayon ini nga buksan sa motorista samtang ginapaidalom sa jet grouting.
Sa interview sang Bombo Radyo kay Engineer Nilo Jardeleza, structural engineer, iya ginpahayag nga apisar nga gamay lang nga volume sang salakyan ang nagalabay, mahimo sa gihapon makatuga sang disturbo sa flyover ilabi na kapasidad sini samtang ginapaidalom sa jet grouting.
Suno kay Jardeleza, bisan gamay lang nga vibration, makaapekto ini sa pagdukot sang pier sang flyover ilabi na nga wala pa ini naka-setting-out.
Ginpahayag man sini nga una na nila nga gintawag ang atensyon sang nagadumala sang flyover bangud man sa nakitaan ini sang pag-usmod sa pier number 1.
Nagapati man ang natungdan nga apisar ano pa ka nami ang pag-jet grout sa flyover, may tsansa ini sa gihapon nga mag-usmod.
