Gin-athag sang isa ka law expert ang katungdanan sang Korte Suprema kaangot sa paghilway sa isa ka priso matapos nga napreso sang masobra sa maximum imposable penalty.
Sa interview sang Bombo Radyo kay Atty. Alfredo Arungayan III, Bombo Abogado, iya ginpahayag nga isa ka halimbawa sini amo ang desisyon nga ginsulat ni Associate Justice Mario V. Lopez, ginsakdag sang Second Division sang Korte ang conviction sa qualified theft case ni Jovelyn Antonio apang ginmando man ang iya gilayon nga pagguwa sa prisuhan bangud natapos na niya ang iya sentensya.
Sang 2011, ginsentensyahan si Jovelyn sang reclusion perpetua ukon halos 40 ka tuig nga pagkapreso sang Regional Trial Court kag napreso man sa Correctional Institution for Women bangud sa pagpangawat sang kwarta sa iya employer nga GQ Pawnshop. Bilang tiglikom sang GQ Pawnshop, responsibilidad ni Jovelyn nga siguraduhon nga indi peke ang mga ginprenda.
Napamatud-an naman nga naggamit ini sang mga kakunsabo sa pagprenda sang mga peke nga items nga nagalab-ot sa PHP 585,250.
Base sa kalkulasyon sang Korte, indi dapat magsobra sa napulo ka tuig kag walo ka bulan ang pagkapreso sini.
Suno kay Arungayan, sa idalom sang Article 89, paragraph 2 sang Revised Penal Code, ang kriminal nga salabton ginadula kon ang sentensya ginapatuman.
Ginpahayag man sini nga ang sobra nga pagpatuman sang maximum imposable penalty ang nagatapak man sa dignidad sang mga bilanggo.
Nahibaluan nga ang gahum sang korte sa pagbilanggo ginaupdan man sang katungdanan nga gilayon nga hilwayon ang mga bilanggo kon sila napreso sa sulod sang panahon nga mas malawig sa maximum imposable penalty.
