Ginakabig sang officer-in-charge sang San Dionisio Municipal Police Station nga accident prone area ang dalan sa Barangay Canas, San Dionisio, kon sa diin nabungguan-patay sang pick-up truck ang mag-asawa kag ila bata samtang nagasakay sa motorsiklo.
Ang mga biktima amo sanday alias Artemio, ginabanta 60-anyos; alias Angelie, ginabanta 50-anyos; kag ang 15-anyos nga bata nila nga si alias Angelie, lunsay residente sang Barangay Cubay sa amo nga banwa.
Ang driver naman sang pick-up truck amo si alias Alex, 26-anyos nga negosyante kag residente sang Calinog, Iloilo.
Sa interview sang Bombo Radyo Police Captain Edward Villanis, officer-in-charge sang San Dionisio Municipal Police Station, iya ginpahayag nga nagpasa na ang barangay officials sang Brgy. Canas sang letter of complaint sa Department of Public Works and Highways naangot man sa karsada nga masami ginaluntaran sang vehicular accident.
Suno kay Villanis, makapila naman ka beses nga nag-request ang mga opisyal sang barangay sa DPWH nga pabutangan sang signages sa amo nga dalan agud nga mapahagan-hagan ang aksidente sa lugar.
Ginpahayag man sang natungdan nga masami nga may gulpiyada lang nga nagatabok nga mga ati community kag kabataan sa dalan, nga natunaan man sang disgrasya.
Buwas naman nga adlaw mahibaluan kon magapasaka sang kaso ang pamilya sang mga biktima batok sa driver sang hilux nga pick-up.
Nagaguwa sa imbestigasyon nga madulom ang dalan sang nag-overtake ang hilux pick-up sa na-wala nga porsyon sang dalan, apang, nayudyod sini ang motorsiklo sang ginabanta 100 metros ang kalayuon.
Dead on the spot ang mag-asawa samtang nadala pa sa ospital sa Sara ang dalagita nila nga anak, apang ginbawian man sang kabuhi.
Nahibaluan nga mamilasyon lang kontani ang tatlo ka biktima sa Carles, Iloilo samtang ang driver naman sang hilux nga pick-up ang padulong kontani sa Estancia, Iloilo.
