Magapatuman sang imbestigasyon ang National Police Commission (NAPOLCOM) sa nagluntad nga insidente sa Barangay Canas, San Dionisio, Iloilo kon sa diin, patay ang mag-asawa kag ila anak matapos ginbungguan sang pick-up truck.
Ang mga biktima amo sanday Artemio Arabe, 64, Rosemarie Asupra, 58 kag ila anak nga si Angelie, 15, lunsay residente sang Barangay Cubay, San Dionisio, Iloilo.
Ang driver naman sang pick-up truck amo si alias Tomy Clarito, 26-anyos nga negosyante kag residente sang Calinog, Iloilo.
Sa interview sang Bombo Radyo kay Atty. Michelle Yotoko, Spokesperson sang National Police Commission, iya ginpahayag nga gina-monitor nila ang San Dionisio Municipal Police Station kon bala sila ang may kapaltahan sa pag-release sang driver sang hilux pickup.
Suno kay Yotoko, indi pa makahimo sang konklusyon ang talatapan kon may lapses bangud man nga wala paman madetermina ang tanan nga ‘facts’.
Ginpahayag man sang natungdan nga ginalantaw sang NAPOLCOM kon ano ang mga factors nga nag-lapse lang ang reglementary period kag wala na-file ang kaso.
Una na nga ginpahayag sang San Dionisio Municipal Police Station nga nakaguwa ang driver bangud nag-lapse ang reglementary period sini kag wala maka-file sang kaso ang nabilin nga himata sang mga biktima.
