Magapatigayon sang kaugalingon nga imbestigasyon ang Regional Civil Security Unit 6 sa armas nga gingamit ni John Castro Jr. sa pagluthang-patay kay Kagawad Joevani Triste sang Brgy. San Rafael, Tigbauan, Iloilo.
Sa interview sang Bombo Radyo kay Police Colonel Edward Aquintey, Chief sang Regional Civil Security Unit 6, iya ginpahayag nga wala ginadula sang talatapan ang posibilidad nga nagamit na sa iban pa nga insidente ang armas-luthang nga gingamit ni Castro sa pagtiro sa anay punong barangay.
Suno kay Aquintey, nagakoordinar naman sila sa crime laboratory agud nga ma-subject ang armas sa ballistic examination kag matumod kon may mag-match diri.
Ginpahayag man sini nga nasumiter na sang talatapan sa Iloilo Police Provincial Office (IPPO) ang inisyal nga resulta sang firearm investigation.
Nagalaum man ang natungdan nga makabulig ang resulta agud mapadasig ang dalagan sang kaso kag mahatagan sang hustisya ang pamilya Triste.
Una na nga ginbuyagyag ni Iloilo Police Provincial Office (IPPO) Director Police Colonel Bayani Razalan nga nakarehistro sa pangalan ni AAMBIS-OWWA Party-list Representative Atty. Lex Colada ang pusil nga gin-gamit ni Castro sa pagpatay kay Triste.
Madagdag naman ang RCSU sang permanent revocation sang lisensya sang armas ni Representative Colada, kon mapamatud-an nga may negligence sa iya bahin kag wala sini nasekyar ang iya pusil.
