Nagpa-Bombo ang isa ka iloy matapos nga wala mahatagan sang maayo nga intervention ang iya anak sang San Miguel Municipal Social Welfare and Development (MSWDO).
Ini kasunod man sang ginapahayag nagpositibo nga ginhimuslan ang iya anak sang isa ka tigulang sa ila nga lugar.
Sa interview sang Bombo Radyo kay Regina Sinoben, tagreklamo, iya ginpahayag nga sugod sang ginhimuslan ang iya anak, naglain na ang pangginawi sini, kon sa diin, masami ini nga nagapamuyayaw sa iya amay.
Suno kay Sinoben, nagabalaka man ang iya anak bangud ginapahayag nga ginapahog siya sang tigulang nga patyon ang siya lakip na nga sila nga ginikanan.
Indi man luyag sang iya bata nga liwat magpa-doktor bangud man sa trauma nga nabatyagan sini.
Ginpahayag man sang natungdan nga sang nagdangop siya sa talatapan sang local nga panguluhan sang San Miguel, ginsilingan siya nga dal-on ang iya nga bata apang, gin-ako man sini nga indi niya madali-dali nga madakop ang iya anak bangud nga nagapamalibad ini nga magsunod bangud man sa kahadlok.
Nagalaum man ang iloy nga mahatagan sang igtalupangod ang iya bata agud nga indi na makabatyag sang trauma.
Sa subong, ginahulat nalang sang pamilya nga mahulugan sang warrant of arrest ang 62-anyos nga tigulang nga ginapahayag naglugos sa dalagita.
