Nagkoordinar ang Department of Public Works and Highways (DPWH) Region 6 sa Local Government Unit sang San Dionisio, Iloilo agud nga mabutangan sang street lights ang dalan kon sa diin nabunggo-an-patay ang mag-asawa kag ila anak.
Ang mga biktima amo sanday Artemio Arabe, 64, Rosemarie Asupra, 58 kag ila anak nga si Angelie, 15, lunsay residente sang Barangay Cubay, San Dionisio, Iloilo.
Ang driver naman sang pick-up truck amo si alias Tomy Clarito, 26-anyos nga negosyante kag residente sang Calinog, Iloilo.
Sa interview sang Bombo Radyo kay Engineer Sanny Boy Oropel, Director sang Department of Public Works and Highways Region 6, iya ginpahayag nga masami nga madasig ang pagpadalagan sang mga motorista sang ila salakyan sa lugar bangud man nga four lanes ang dalan, rason nga indi malikawan nga may nagakadisgrasya.
Suno kay Oropel, gilayon nila nga gintawgan ang district engineering sang San Dionisio matapos nahibaluan ang natabo nga insidente kag ma-assess ang dalan.
Gin-ako man sini nga mga markings sa dalan ang na-fade ukon na-erase na sa kadugayon.
Ginalantaw naman sang natungdan nga maghimo sang modification sa alagyan agud mapasangkad ang kapasidad sini.
Gin-athag man ni Oropel nga kon butangan sang madamo nga slow down signage ang dalan, kon madasig ang pagpadalagan sang mga motorista, may madisgrasya sa gihapon nga magaluntad.
Una na nga nagsulat ang mga opisyal sang Barangay Canas, San Dionisio sa DPWH agud nga madugangan ang mga street lights sa lugar bangud masami ini nga madulom.
