Nagpanindugan si President Ferdinand “Bongbong” Marcos, Jr. nga indi magkooperar ang iya administrasyon sa International Criminal Court (ICC) sa imbestigasyon sa brutal drug war sang Duterte administration.
Sa ginpatigayon nga hearing sang House Quad Committee (QuadComm) sang Miyerkules, ginhangkat ni anay President Rodrigo Duterte ang ICC nga magpatigayon sang gilayon nga imbestigasyon sa iya war on drugs, nga ginabasol sa kamatayon sang linibo ka mga indibidwal.
Suno kay Marcos, indi pagpunggan sang gobyerno ang ICC probe kasunod sang ginhambal ni Duterte.
Matandaan nga nagbulag ang Pilipinas sa Rome Statute, ang kasugtanan nga nagtukod sang ICC, sang 2019 matapos gin-umpisahan sang The Hague-based tribunal ang imbestigasyon sa drug war sang administrasyon ni Duterte.
Una na nga ginpahayag ni Executive Secretary Lucas Bersamin nga indi magpamalabag ang gobyerno kun luyag ni Duterte nga isungka ang iya kaugalingon sa hurisdiksyon sang ICC.
Suno kay Marcos, padayon na nga gina-imbestigaran sang Philippine National Police (PNP) kag Department of Justice (DOJ) ang mga napatay sa drug war sa panahon ni Duterte.
Ginsulit man ni Marcos ang panindugan ni Justice Secretary Jesus Crispin Remulla nga ang Pilipinas may obligasyon nga magsunod sa mga pahibalo sang International Police (Interpol) apisar kon ang iya mga akto ang may kaangtanan sa ICC ukon wala.
Nagpasalig man ang Presidente nga committed ang iya administrasyon sa pagtinguha sang hustisya para sa mga biktima sang extrajudicial killings sa tion sang implementasyon sang drug war.
