Ginkumpirma sang Philippine National Police (PNP) nga nagpaidalom sa dugang nga tests sa children’s hospital sa Quezon City ang gina-alegar child sexual abuser nga si Apollo Quiboloy.
Suno kay PNP public information office chief Brig. Gen. Jean Fajardo, madasig lang ang pagbisita sang pastor sa Philippine Children’s Medical Center para magpaidalom sa medical tests nga nagakinahanglan sang specialized equipment.
Ginbalik man gilayon ang religious leader sa Philippine Heart Center kun sa diin magapabilin ini tubtub nga magtakop na ang medical furlough nga ginpasugtan sang korte.
Ginalauman nga mabalik si Quiboloy sa custodial facility sang PNP alas singko buwas sa hapon, Nobyembre 16.
Gin-report man ni Fajardo nga ginbasura sang korte ang request ni Quiboloy nga magbaton sang mga bisita samtang yara siya sa Heart Center.
Nobyembre 8 sang gin-aprubahan sang korte sa Pasig ang request sang kampo ni Quiboloy para sa medical furlough bangud sa pagpalamin-ot sang iya dughan.
Indi man pagpasugtan sang PNP ang request sang kampo ni Quiboloy nga sila na ang magakay-o mismo sang custodial facility para sa pastor.
Una na nga ginpahayag sang abogado sini nga masobra na sa 70-anyos ang edad sang pastor kag mabudlay na para sa iya ang paglimpyo pati sang iya toilet.
Ginpahayag man anay ni Atty. Israelito Torreon nga naghingyo sila sa pulis nga may ibutang nga gamit sa detention cell para mangin maayo ang ventilation.
Nahibaluan nga naka-detain si Quiboloy bangud sa mga kaso nga qualified human trafficking kag sex abuse nga na-file sa Pasig kag Quezon City courts apang magapadalagan pa ini sa pagka-senador sa 2025 elections.
