Ginaimbestigaran na sang Tigbauan Municipal Police Station kon sin-o ang sa likod sang mga karatula nga nakapaskil sa pila ka dalan sa Tigbauan, Iloilo.
Nakasaad sa karatula ang pagpangayo sang ayuda kay President Ferdinand Marcos, Jr. kag pagpahayag sang kahadlok sa dalagko nga pulitiko kaangot sa kamatayon ni Kagawad Joevani Triste sang San Rafael, Tigbauan.
Sa interview sang Bombo Radyo kay Police Captain Alfred Mansoy, Chief of Police sang Tigbauan Municipal Police Station, iya ginpahayag gina-establisar pa kon ano ang motibo sang nagbutang sang karatula nga nagaangot sa pulitiko.
Suno kay Mansoy, nagmando na siya sa imbestigador nga lantawon ang pila sa kuha sang mga closed circuit television ukon CCTV nga malapit sa lugar agud matumod kon sin-o ang mga tawo sa likod sang karatula.
Ginkadtuan naman sang pila ka mga otoridad ang lugar agud masekyar kag ma-assess.
Nagpanugyan man ang natungdan sa mga residente sang Tigbauan nga mangin responsable sa ila ginahimo ilabi na kon makaapekto sa kadam-an kag makatuga sang kahadlok.
