Ginmandu ni Philippine National Police (PNP) Chief Gen. Rommel Marbil ang immediate dismissal sang 11 ka Special Action Force (SAF) officers bangud sa grave misconduct nga naangot sa paghatag sang escort service ukon kaso sang moonlighting.
Kasunod ini sang nangin rekomendasyon ang PNP Internal Affairs Service (IAS) bangud sa ila pagtabon-tabon sa duha ka Zamboanga-based SAF members nga nagserbe bilang private security para sa Chinese national apisar nga wala man sang husto nga otorisasyon.
Nag-ugat ang kaso sang Mayo 2024 sang may tapungulay nga natabo sa residential village sa Muntinlupa City sa tunga sang duha ka SAF members rason nga nabukaran kun ano ang ila assignment sa lugar.
Sa statement sang PNP sini nga Nobyembre 15, ginsiling nga base sa imbestigasyon sang IAS, ang battalion commander kag executive senior police officer ang nag-deploy sa duha ka personnel agud magtrabaho bilang private security.
May duha pa gid ka battalion officers nga nag-peke sang daily reports para mapaguwa nga present man sa duty ang duha ka SAF members.
Sa kabug-usan, isa ka lieutenant colonel, tatlo ka captains, duha ka lieutenants, isa ka executive master sergeant, duha ka senior master sergeants, kag duha ka corporals ang ginpangsipa halin sa pwersa sang kapulisan.
Napamatud-an nga guilty sila sa grave misconduct, dishonesty, grave irregularity sa performance sang trabaho, kag conduct unbecoming of a police officer.
Dugang pa, may isa ka captain ang guilty man sa simple neglect of duty kag less grave neglect of duty kag pagasuspendihon sa sulod sang isa ka bulan.
Suno kay Brig. Gen. Jean Fajardo, spokesperson sang PNP, ang gin-dismiss nga officers ang mahimo makapangita sang legal remedies kaangot sa ila kaso apang gin-athag sini nga “summary dismissal proceeding” ang order sang PNP chief bangud sa kabug-aton sang ila mga nahimo nga sala.
Sa iya statement, ginklaro naman ni Marbil nga indi sini pag-itolerar ang ini nga sahi sang pagbinutig.
“Let it be clear that the Philippine National Police does not and will not tolerate any form of misconduct or dishonesty within its ranks… This is a message to all PNP personnel: We are here to serve the people with integrity, and we will continue to cleanse the ranks of those who undermine the trust placed in us,” dugang sini.
Una na nagpaandam si Marbil nga pangsipaon sini sa pwesto ang mga pulis nga involved sa moonlighting kun mapamatud-an nga guilty sa misconduct.#
