Ginpasakaan sang kaso nga paglapas sa Presidential Decree no. 1727 ukon Malicious Dissemination of False Information of The Willful Making of Any Threat Concerning Bombs ang nagpamahog nga may bomba sa campus sang Iloilo Science and Technology University (ISAT-U), La Paz, Iloilo City.
Sa interview sang Bombo Radyo kay Police Major Tranquilino Querubin, Hepe sang La Paz Police Station, iya ginpahayag nga mismo opisyal sang nasambit nga unibersidad ang nagpasaka sang kaso batok sa nag-bomb threat.
Suno kay Querubin, ang status sang subject sang kaso ang ‘arestado’ apang, wala sini gina-ako nga siya mismo ang nagkomento sang threat sa page sang eskwelahan.
Liwat-liwat naman nga ginahambal sang nag-bomb threat nga na-hack ang iya account rason nga na-post ang nasambit nga komento sa facebook.
Kon balikan, nagtuga sang kahadlok sa mga estuydante kag empleyado sang ISAT-U ang nangin komento rason nga gilayon ginkansela ang klase kag trabaho sang unibersidad.
Matapos ang pila ka oras nga pagsekyar sang kapulisan sa campus, gindeklara nga ‘safe’ ukon hilway sa bomba ang eskwelahan.
Sa karon, sa balor nga P30,000, nakapyansa ang subject matapos nga napasakaan sang legal nga panumbungon.
