Ginapabugal ni Atty. Ruel Von Superio, Iloilo Provincial Population Officer, ang 2,489 ka mga volunteer Barangay Service Point Officers nga amo ang pinakamadamo sa bug-os nga Pilipinas.
Suno kay Atty. Superio, may yara sang full-fledged Provincial Population Office ang Iloilo sa diin 69 ang permanent plantilla personnel.
Ginpakigbahin man niya nga ang National Congress sang mga population officers, workers kag volunteers ang hiwaton sa Iloilo sa masunod nga tuig sa diin ipasundayag sang Iloilo Province ang best practices kag innovations may kaangtanan sa Population and Development Programs.
Sa pag-establisar naman sang Teen Centers, Iloilo Province sa gihapon ang may pinakamadamo sa bug-os nga Pilipinas.
Sa subong, may yara na sang 102 teen centers ang probinsya.
Pahayag niya, sa bulig ni Governor Arthur Defensor Jr., umpisahan na subong nga tuig ang pagpatindog sang lima ka mga opisina para sa Provincial Population Officers sa kada Local Government Unit balor P5 million kada isa kag ini ang pagatawgon nga MorProGRes Building – two-storey Family and Youth Development Center.
Subong nga adlaw ginhiwat ang 2024 Provincial Barangay Service Point Officers Congress sa diin gintambungan ini ni Gov. Defensor, Anilao Mayor Lee Ann Debuque, Liga ng mg Barangay Provincial President Amalia Debuque, 2nd District Board Member June Mondejar kag Senator Bong Revilla.
Gindayaw sang senador ang kadamuon sang BSPOs sa probinsya sang Iloilo kag nagsiling nga tinguhaan niya nga pasudlon sa TUPAD program ang 2,489 ka mga volunteer.
Nagpasalig man ini nga magahatag siya sa Iloilo Province sang P100 million nga balor sang proyekto.
Si Senator Revilla ang princial author sang Senate Bill No. 14896 ukon, “The Mandatory Establishment of Provincial, City and Municipal Population Office Act of 2022.”
