𝗜𝗟𝗢𝗜𝗟𝗢 𝗖𝗜𝗧𝗬 – Nag-angkon sang pagdayaw ang Iloilo City kadungan sang pag-host sang 44th Executive Committee Meeting sang CityNet – ang pinakadako nga Asia-Pacific network sang urban stakeholders nga nakatutok sa sustainable development.
Bwas, pormal na nga magatakop ang tatlo ka adlaw nga kahiwatan sa Iloilo City Convention Center sa diin tema ang “Living the Sustainable Development Goals (SDGs): A Shared Future for All.”
Sa interview sang Bombo Radyo Iloilo kay Makati City Mayor Abigail Binay, iya ginpahayag nga magluwas sa best practices sa Iloilo City, nag-enjoy man sila sa mga manumit nga pagkaon sa Iloilo City kaangay sang batchoy, seafoods, pancit molo, siopao kag inasal nga manok nga nagapamatuod nga ang syudad ang UNESCO Creative City for Gastronomy.
Plano man sang alkalde nga ipatuman sa ila lugar ang progressive urban initiative sa Iloilo partikular ang matinlo nga palibot, smoke-free policies, kag ang kilala na Iloilo River Esplanade.
Magluwas diri, ginpakigbahin man ni Binay ang mga innovations sa Makati City bilang naga-isahanon nga syudad sa Pilipinas kag Southeast Asia nga kinilala bilang Resilience Hub.
Nahibaluan nga nalakip si Binay sa 100 nga mga urban leaders kag stakeholders halin sa Asia-Pacific region nga nagtambong sa kahiwatan.
