𝗜𝗟𝗢𝗜𝗟𝗢 𝗖𝗜𝗧𝗬 – Suportado sang grupo sang mga Senior Citizens ang House Bill 10985 ukon Employment Opportunities for Senior Citizens and Private Entities.
Sa interview sang Bombo Radyo kay Edwin Espejo, Commissioner sa National Commission of Senior Citizens, iya ginpahayag nga personal siya nga nagtambong sa committee hearing antes naaprubahan ang hagna.
Suno kay Espejo, pinaagi sini mahatagan sa gihapon sang oportunidad nga makatrabaho ang mga senior citizen apisar yara na sa retirement age.
Ginpahayag sini nga dapat hatagan sang kahigayunan ang mga senior citizen nga mangin produktibo pinaagi sa paghatag sang trabaho agud indi lang magsalig sa ila pension, ilabi na kun masarangan pa man nila nga maghulag.
Nagalaom man ini nga magpasar man ang senado sang ila version sa labing madali nga panahon agud mangin layi na ini.
Nahibaluan nga lakip sa mga trabaho nga mahimo sudlan sang mga senior citizen amo ang clerical ukon secretarial works, consultancy, cleaning ukon janitorial services, event organizing, teaching, kitchen help, sales assistance, kag Business Process Outsourcing (BPO).
Ang mga pribado nga kompaniya nga makigbahin ang hatagan sang dugang nga deduction sa ila gross income nga katumbas sang 25% sang kabug-usan nga balor sang bayaran para sa salaries, wages, benefits kag training para sa senior citizens.
Ilibre man ang pagkuha sang senior citizens sang mga dokumento para sa pagsulod sa trabaho kaangay sang Birth Certificate, Police Clearance, kag Medical Certificate.
