Ginalantaw sang Molo Police Station nga posible nga may kaangtanan sa iligal nga druga ang rason sa pagluthang-patay sang riding-in-tandem suspects sa isa ka soltero sa MH del Pilar St., Taal, Molo, Iloilo City.
Ang biktima amo si Cris Mark Gapol, residente sang Calumpang, Molo, Iloilo City.
Sa interview sang Bombo Radyo kay Police Captain Ryan Christ Inot, Officer-in-charge sang Molo Police Station, iya ginpahayag nga sang ginbukad ang cellphone sang biktima, nakit-an nga may transaksyon ini sang iligal nga druga kay alyas RK.
Si RK amo ang ginatudlo nga principal accessory to the crime bangud ini ang nagpilit kay Gapol nga magpadulong sa lugar kun sa diin natabo ang pagpangluthang.
Suno kay Inot, si RK amo man ang ginabais ni Gapol sa cellphone base man sa pahayag sang driver sang tricycle nga ginsakyan sang biktima.
Naggwa man sa imbestigasyon nga may yara sang utang si Gapol kay RK para sa mga “items” nga posible nagatumod sa illegal drugs, suno sa otoridad.
Sa subong, yara na sa paghinakop sang mga kapulisan si RK nga ginapatihan nga suspek sa pagpatay sa biktima.
Ginkustodiya man sang kapulisan si alyas Makoy, 16 anyos, nga upod ni Gapol sa tricycle.
Si Makoy ang nag-ako nga si RK ang nagtawag sa iya agud nga pakadtuon si Gapol sa lugar kun sa diin ini gintiro.
Ginpahayag man nga may ihibalo si Makoy sa himuon nga krimen bangud naglumpat ini halin sa tricycle kag nagdalagan antes pa man natiruhan si Gapol.
Si Makoy ang mahimo pasakaan sang kaso nga accessory to the crime samtang si RK naman ang mahimo kasuhan sang principal accessory to the crime of murder.
Ginhilway naman si Junjie Barrios nga amo ang driver sang tricyle kag nagaserbe subong nga testigo sa krimen kag nagpahayag nga tingog gid ni RK ang iya nabatian nga ginabais ni Gapol antes ang krimen.
