Ginkumpirma sang Barangay Council sang Calumpang, Molo nga madamo sang ginkaulamiran nga kinagamo kag krimen ang biktima nga naluthangan-patay samtang ini ang nagasakay sa tricycle sa Taal, Molo, Iloilo City.
Ang biktima amo si Cris Mark Gapol,18, residente sang Calumpang, Molo, Iloilo City.
Sa interview sang Bombo Radyo kay Kagawad Lordene Lim, iya ginpahayag nga 14 anyos palang si Gapol, may mga records na ini sang pagpanglambat sa dalan, pagpanghaboy sang botelya kag nakabuno pa ini.
Suno kay Lim, nakatinir pa si Gapol sa Balay Dalayunan bilang isa ka Child in Conflict with the Law bangud sa pagpangbuno.
Dugang niya, nagapadayon pa subong ang hearing sa kaso kag nakapiyansa man si Gapol.
Sa pagkamatuod, madamo man sang mga incident reports kun sa diin involved man si Gapol apang wala lang mapadayon bangud wala sang complainants.
