Natalana nga pasakaan sang murder complaint ang mga indibidwal nga ginakabig nga suspects sa pagluthang-patay sa soltero sa Brgy. Taal, Molo, Iloilo City.
Ang biktima amo si Cris Mark Gapol,18, residente sang Calumpang, Molo, Iloilo City.
Sa interview sang Bombo Radyo kay PCapt. Ryan Christ Inot, hepe sang Molo Police Station, iya ginpahayag nga ang pasakaan sang murder complaint amo sanday RK Magbanua nga ginakabig nga principal accessory to the crime of murder;kag alyas Makoy nga accessory to the crime.
Si RK amo ang ginatudlo nga principal accessory to the crime bangud ini ang nagpilit kay Gapol nga magpadulong sa lugar kun sa diin natabo ang pagpangluthang.
Suno kay Inot, si RK amo man ang ginabais ni Gapol sa cellphone base man sa pahayag sang driver sang tricycle nga ginsakyan sang biktima.
Naggwa man sa imbestigasyon nga may yara sang utang si Gapol kay RK para sa mga “items” nga posible nagatumod sa illegal drugs, suno sa otoridad.
Ang 16-anyos naman nga si alyas Makoy amo ang upod ni Gapol sa tricycle.
Gin-ako ni Makoy nga si RK ang nagtawag sa iya agud nga pakadtuon si Gapol sa lugar kun sa diin ini gintiro.
Ginpahayag man nga may ihibalo si Makoy sa himuon nga krimen bangud naglumpat ini halin sa tricycle kag nagdalagan antes pa man natiruhan si Gapol.
Una na nga ginhilway si Junjie Barrios nga amo ang driver sang tricyle kag nagaserbe subong nga testigo sa krimen kag nagpahayag nga tingog gid ni RK ang iya nabatian nga ginabais ni Gapol antes ang krimen.
