Pilason ang 58-anyos nga lalaki matapos nga ginbungguan sang isa ka pribado nga salakyan sa banwa sang Leganes, Iloilo samtang ini ang nagasakay sa iya nga bisikleta.
Ang biktima amo si Alyas Nando, 58-anyos, residente sang nasambit nga lugar.
Sa interview sang Bombo Radyo kay Alyas Nando, iya ginpahayag nga sang nagatabok na siya sakay sa iya nga bike sa isa ka coastal road, gulpiyada nga ginbungguan siya sang private vehicle.
Suno kay Nando, bangud sa madasig nga pagpadalagan sang nasambit nga salakyan, naigo sa manobela sang iya nga bisikleta ang iya nga kilid sang tiyan samtang nagupi naman ang radius sang iya nga bike.
Ginpahayag man sini nga wala na nagpadugay ang driver sang private vehicle bangud suno sa iya, nagadali ini kag mapadulong pa sa airport sa Cabatuan.
Nagbilin naman sang P1,000 ang driver sang Private Utility Vehicle nga ibakal sang bulong sang biktima, kon sa diin nagpasalig nga magabulig ini sa pagbayad sang medical expenses apang, wala na nagpabatyag sa ulihi nga bahin.
Naglab-ot naman sa P8,000 ang nagasto sang biktima kag nagalaum nga liwat makapakig-angot sa iya ang driver sang salakyan nga may plate number nga NIM 2679 agud nga mahusay kag mabayran ang natuga sini nga damage.
Nagpanugyan naman ang Leganes Municipal Police Station sa driver sang Private Utility Vehicle nga indi sini paglagyohan ang iya responsibilidad sa biktima bangud indi lamang damage sa propedad ang iya nga natuga kundi pati sa ikaayong-lawas sang biktima.
Magapakig-angot naman ang talatapan sa Land Transportation Office (LTO) agud nga ma-trace ang salakyan kag mapanabat sa iya natuga nga insidente.
