“Christmas Village sa Makabagong Pilipinas”
Indi lang mga pumuluyo sa Iloilo kundi sa bilog gid nga Pilipinas ang target ni Iloilo Governor Arthur Defensor Jr. nga maganyat pinaagi sa liwat nga pagpasiga sang Provincial Capitol sa Disyembre 6, 2024.
Tuigan na nga kahiwatan sang Iloilo Provincial Government ang opening of lights kada Disyembre agud makalagaw ang mga pamilya upod ang ila mga kabataan.
Sa interview sang Bombo Radyo kay Governor Defensor, iya ginpahayag nga mas ginpanami kag mas madamo ang makit-an sang tawo nga mga dekorasyon sa Kapitolyo.
Sa pangkabug-usan, P4 million ang pondo para sa Christmas Village subong nga tuig mas mataas kun ipaanggid sang 2023 nga yara sa P3.5 million.
Suno sa gobernador, mas maayo nga mag-invest ang probinsya sa nasambit nga kahiwatan agud mas makilala ang Iloilo kag mas madamo ang magpadulong sa probinsya kag syudad.
Kun madamo ang bisita pahayag niya, mangin maayo ang turismo. Kag kun maayo ang turismo, magadugang man ang ekonomiya.
May yara naman sang Trade Fair kag Food Festival nga ipahamtang umpisa Disyembre 6 tubtob Disyembre 29.
Magluwas sina, may Christmas Film Showing man umpisa Disyembre 10.
Magalawig ang Christmas Village sa Kapitolyo sa Disyembre 29.
