Nagpanugyan ang Task Force on Anti-Squatting and Illegal Structures Unit (ASIS-U) sa mga politiko nga ipahanumdom sa ila mga personnel nga indi magtakod sang mga tarpaulins sa puno sang kahoy kag mga poste sa Iloilo City.
Sa interview sang Bombo Radyo kay Love Joy Hosenilla, Head sang Anti-Squatting and Illegal Structures Unit, iya ginpahayag nga isa sa mga ila ginahimo subong ang pagpangkakas sa mga tarpaulins sang mga politiko nga yara sa electrical post kag mga kahoy.
Suno kay Hosenilla, naglab-ot na sa 589 ka mga posters ang ginkakas sang ila nga talatapan nga nakatakod sa mga poste kag kahoy.
Ginpahayag man sang natungdan nga kalabanan sa mga nakakas amo ang ginapanag-iyahan sang nagapapili para sa 2025 midterm elections.
Nagalaum man ini nga magkooperar ang mga politiko sa tikang nga ginapatuman sang syudad.
