Gin-aprobahan sang Department of Labor and Employment (DOLE) Region VI nga kakson sa ila listahan ang isa sa Government Internship Program (GIP) grantee ni Iloilo City Lone District Representative Julienne “Jam-Jam” Baronda.
Ini kasunod man sang pagkaulamid ni Pearl Hugo sa drug-buy bust operation sa Brgy. Dungon B, Jaro, Iloilo City sang Nobyembre 13.
Sa interview sang Bombo Radyo kay Atty. Sixto Rodriguez, Jr. Director sang Department of Labor and Employment Region VI, iya ginpahayag nga nabaton sang ila talatapan ang dokumento halin sa opisina ni Baronda nga may tinutuyo nga i-terminate ang amo nga indibidwal halin sa programa sang ila opisina.
Suno kay Rodriguez, ini man ang nangin basehan nila agud nga aprobahan ang hingyo sang kongresista sa ila talatapan.
Ginpahayag man sini nga antes maaprobahan ang isa ka dokumento nga ginapangayo sang isa ka talatapan, kinahanglan anay nga mag-comply sa mga pagsulundan sang DOLE.
Nahibaluan nga ginabanta 6 grams sang suspected shabu nga may standard drug price nga P40,800 ang nakuha sa anay GIP grantee ni Baronda lakip na pila ka non-drug items.
Una naman nga gin-ako ni Baronda nga wala sila nakapatigayon sang ma-id-id nga background checking sa mga grantees rason nga nakasulod ang natungdan.
