Nagpaathag ang Department of the Interior and Local Government (DILG) – Iloilo City kon ngaa wala nadala ang syudad sa Seal of Good Local Governance (SGLG).
Sa interview sang Bombo Radyo kay Oscar Lim, City Director sang Department of the Interior and Local Government (DILG) – Iloilo City, iya ginpahayag nga wala nadala ang syudad sang Iloilo sa national validation sang Seal of Good Local Governance, bangud tubtob sa regional validation lamang ini nakalab-ot.
Suno kay Lim, isa sa ginalantaw nga problema kon ngaa wala nakapasar ang syudad sa validation amo ang disbursement sang funds sa 20% development fund.
Ginpahayag man sang natungdan kag suno sa indicator, supposedly, dapat pag-abot sang Disyembre 31, 2023, kinahanglan nga naka-disburse ukon napaguwa na ang 100% sang fund.
Nag-apelar naman ang talatapan sa Bureau of Local Government Finance (BLGF) bangud man nga indi control sang DILG ang data kag nakabase lamang ini sa report nga ginasumiter sang talatapan sa BLGF.
Wala naman nagpasugot ang national, rason nga wala nalakip ang Iloilo City sa Seal of Good Local Governance.
