Patay ang duha ka driver sang motorsiklo matapos nagbungguanay sa Barangay Abong, Carles, Iloilo.
Ang mga biktima amo sanday Ronaldo Golingan, 43-anyos isa ka construction worker kag residente sang Barangay Cabilao Grande, Carles; samtang, ang ika-duha nga driver amo si Rommel Siason Pagayunan, 20-anyos kag residente sang Barangay Abong, Carles.
Sa interview sang Bombo Radyo kay Police Master Sergeant Alexis Bataga, imbestigador sang Carles Municipal Police Station, iya ginpahayag nga lunsay magapauli na kuntani ang duha ka driver sang hinali lang nga gin-agaw ni Pagayunan ang linya sang ginasugata sini nga motorsiklo nga ginamaneho ni Golingan kun sa diin nagresulta sa head-on collision.
Gilayon gindala sang Carles Responder ang mga driver sa Jesus Colmenares District Hospital apang lunsay gindeklara nga dead on arrival bangud sa naagum nga patal nga pilas sa ulo kag lawas.
Nahibaluan nga lunsay wala sang lisensya kag helmet ang duha ka driver samtang, base sa inisyal nga imbestigasyon, yara sa impluwensiya sang makahulobog nga ilimnon si Pagayunan.
