Patay ang isa ka security guard matapos ginbuno sang iya upod sa sulod sang J & J Dressing Plant sa Brgy. Nabitasan, Leganes, Iloilo.
Ang biktima amo si Joven Porcado,36-anyos sang Tamboilan, Dumangas, Iloilo.
Ang suspek amo si Alyas RJ, 21-anyos sang Batad, Iloilo.
Sa interview sang Bombo Radyo kay Police Captain General Enrique Robles, hepe sang Leganes Municipal Police Station, iya ginpahayag nga may natabu nga pagbaisay sa duwa, matapos ginpasibangdan sang biktima ang suspek nga amo ang nagkuha sang 500 pesos nga ginbilin sa iya para ibayad kuntani sa parcel sang ila kaupdanan sa obra.
Suno kay Robles, nagkuha sang kitchen knife ang suspek kag ginbuno ang biktima sa dughan sang duwa ka beses kag apat ka beses naman sa likod.
Dugang pa sang natungdan, gindala pa sa ospital ang biktima apang ginbawian gid ini sang kabuhi.
Preso subong si Alyas RJ kag si Alyas Leo nga nag-agaw sang armas sang biktima matapos ginsugo sang suspek.
