Ginalantaw sang Estados Unidos sang Amerika nga magasulod na gid kag maga-intra sa gyera sa Ukraine sa labing-madali nga tion ang linibo ka mga soldado sang North Korea nga ginpadala sa Russia.
Suno kay Pentagon chief Lloyd Austin, 10,000 ka North Korean soldiers ang ginapatihan nga ibutang sa Russian border region sang Kursk kun sa diin iga-integrate sila sa Russian formations.
Sa subong suno sa natungdan, wala pa sila sang intel report nga naga-intra na gid sa combat ang mga soldado nga halin sa Pyongyang.
Sang Huwebes, matandaan nga gin-report sang South Korean government officials kag isa ka research group nga naghatag ang Moscow sa Pyongyang sang oil, anti-air missiles kag bulig sa ekonomiya kabaylo sang mga soldado nga ginpadala sini sa Russia.
Una naman nagpahayag ang Kyiv nga ang Moscow kag ang North Korean soldiers ang naglapaw na sa 50,000 kag nagatuyo nga bawion ang parte sang border region nga nasakop na sang Ukrainian forces.
Sa bahin ni Russian President Vladimir Putin, ginpadayaw sini sang nagligad nga adlaw nga madamo sila sang stocks nga missiles nga handa na gamiton subong kag indi sarang nga ma-intercept sang Ukraine.
