Ginapangunahan sang Pinay tennis star nga si Alex Eala indi lang ang Pilipinas kundi ang Asia Oceania Group III sa pagsulod sa Billie Jean King Cup subong nga semana sa Bahrain.
Magahampang ang Philippine women’s team tubtub sa Nobyembre 27 sa Bahrain Tennis Club sa kapital sang pungsod nga amo ang Manama.
Ang 19-anyos nga si Eala kag ang anay Philippine No. 1 nga si Marian Capadocia amo ang standouts sa grupo nga ginpadala sang pungsod.
Yara man sa team ang players nga naka-base sa US nga sanday Khim Iglupas kag Shaira Rivera nga pareho nga naga-compete sa University of West Alabama varsity squad.
Nabunutan ang Pilipinas sa Pool B kaupod sa Qatar, Nepal, kag Guam.
Kinahanglan nga mangibabaw sila sa Pool B agud nga makaabanse sa playoff para sa promotion kun sa diin atubangon naman ang mangibabaw sa Pool C nga ginabug-usan sang Bahrain, Saudi Arabia, Laos, kag Turkmenistan.
Ang winner sa playoffs ang makasulod sa Group II sa 2025.
Nahibaluan nga gin-suspend sang world governing body sang tennis ang Philippine Tennis Association (PHILTA) sang December 2020 bangud sa mismanagement issues. Ini ang rason kun ngaa wala nakaintra ang Pilipinas sa Billie Jean King Cup kag sa Davis Cup sa masobra apat ka tuig, apang na-reinstate subong ang asosasyon bangud sa pagbag-o sang liderato sa local federation.
