Nagdangop sa Bombo Radyo ang isa ka babaye nga nag-alegar nga gina-blackmail sang iya chatmate nga nagapakilala nga foreigner.
Sa interview sang Bombo Radyo kay alyas Mysterious Girl, iya ginpahayag nga nakilala niya ang lalaki nga si alyas Steve sang nag-chat ini sa iya kag iya man nga gin-entertain ini.
Suno kay Mysterious Girl, sa dalayon nila nga pag-istoryahanay paagi sa chat, masami na nga nagapangayo sang picture ang lalaki tubtob nga nagpangabay ini nga padal-an siya sang hublas nga laragway.
Pahayag sang natungdan, bangud nakabatyag siya sang problema kag depression sang amo nga tion, napilitan siya nga magpadala ang letrato nga ginapangayo sang lalaki.
Suno pa sa iya, may tion man nga nagauntat-untat ang ila komunikasyon sa isa kag isa.
Sang damlag lang, nakibot na lang ang babaye nga nag-chat ang lalaki nga nagapangayo sang dugang nga mga laragway kag kun indi siya paghatagan, ipalapta niya ang iya hublas nga laragway sang tagreklamo.
