Lalaki, nagpangsulod sa 1,000 ka mga balay agud makuha ang iya ‘stress’
Samtang kita naga-amat-amat edad, amat-amat man nga nagasalampaw ang aton mga katungdanan, problema, balayran, kalain sang buot, kag iban pa gid rason nga masami man kita nga nagaka-kapoy kag nagainit ang ulo.
Lain-lain man ang aton paagi nga maka-cope.
Importante gid ang pag-destress bangud para man ina sa pagpabilin sang maayo nga mental health.
Ikaw, ano bala ang imo ginahimo sa tion nga stressed ikaw?
Sa Japan, may isa ka 37-anyos nga lalaki nga gin-aresto ang mga pulis bangud sa trespassing sa propiedad sa Dazaifu sa southern part sang pungsod.
Sang yara na ini sa kustodiya sang otoridad kag sa dalayon nga pagpamangkot, nag-ako ang lalaki nga indi ini ang una nga propiedad nga iya ginsulod.
Pahayag sini, nagalab-ot na siguro sa 1,000 ka mga balay ang iya ginpangsulod-sulod kag ginhimo na niya ini nga hobby.
Suno pa sa lalaki, nagabatyag siya sang tuman nga thrill ukon excitement sa tion nga panumdumon niya kun madakpan ayhan siya ukon indi.
Sa sobra niya ka-excited, nagapalmahas gid ang iya nga palad, kag amo gid ini suno sa iya ang manami nga feeling.
Amo man ini suno sa iya ang iya paagi agud ma-relieve ang iya stress!
Bangud sini nga hobby, nagtupa siya sa kamot sang otoridad kag ginahulat pa kun ano nga mga kaso ang posible sini pangatubangon.
