Patay sa plane crash sa New York, USA ang isa ka volunteer pilot nga kilala sa pag-transport sa mga na-rescue nga mga sapat.
Ini amo si Seuk Kim, 49, nga may sakay nga tatlo ka ido sang nagbyahe ini halin sa Maryland pakadto sa Albany, New York, apang nagtibusok ang eroplano sa Windham sa Catskill Mountains.
Isa ka ido ang napatay man sa insidente, apang nakaluwas ang duha kag subong naga-recover na.
Nag-ulan gid ang simpatiya kag kasubo kasunod sang plane crash ilabi na sang nahibaluan nga idul-ong kuntani ni Kim ang mga ido sa Animal Shelter of Schoharie Valley (ASSV) nga isa ka no-kill shelter sa Howes Cave, New York.
Kabahin siya sang “freedom flight” volunteer pilots nga nagapasakay sang mga sapat nga ma-rescue halin sa euthanasia lists sa high-kill shelters.
Nagakatabo ang pagpatay sang mga ido bangud nagasulubra na sila sa animal shelters apang isa si Kim sa mga nagboluntaryo nga magbulig kag magsaylo sa ila para sa nagakaigu nga veterinary care.
Gina-imbestigaran naman subong sang National Transportation Safety Board ang rason sa plane crash.
