Nagpanugyan ang Regional Anti-Cybercrime Unit (RACU) VI sa mga social media users nga usisaon sang maayo ang mga ka-chat agud nga malikawan nga ma-blackmail.
Sa interview sang Bombo Radyo kay Police Captain Rexy Calubing, Assistant Chief Operations sang Regional Anti-Cybercrime Unit VI, iya ginpahayag nga indi gilayon maghatag sang salig sa mga maka-chat sa online media platforms ilabi na kon indi kakilala.
Suno kay Calubing, indi gilayon maghatag sang mga personal nga mga impormasyon nga mahimo magamit sang mga indibidwal batok sa aton.
Nagpanawagan man ini sa publiko nga likawan mag-send sang mga sensitibo nga mga laragway nga mahimo magamit sa blackmailing.
Dapat man suno sa natungdan nga gilayon i-video call ang ka-istorya agud matumod kon bala lehitimo ini.
Ginatulod man sang talatapan nga gilayon i-report sa ila kon maka-eksperyensya sang pagpamahog gikan sa mga online scammers.
