Ginpanginwala sang pila sa mga supporters sang mga Duterte nga sila ang ‘hakot’ kag ‘bayad’ agud magpadulong sa EDSA Shrine, Ortigas Avenue, Quezon City.
Ini agud magpakita sang ila suporta kay Vice President Sara Duterte sa tunga sang indi nila pag-intidihanay ni President Ferdinand Marcos Jr.
Sa interview sang Bombo Radyo kay Jeffrey “Ka Eric” Celiz, Sonshine Media Network International Host, iya ginpahayag nga ordinary lamang nga tawo ang mga nagpadulong sa EDSA Shrine agud magpakita sang ila suporta.
Suno kay Celiz, indi sila magahipos agud pamatokan ang mga ireguralidad nga nagakatabo sa idalum sang administrasyon ni Marcos, Jr.
Gin-athag man sini nga boluntaryo nga ginadonar sang supporters sang mga Duterte ang pagkaon kag mga tubig nga ginapanagtag sa amo nga kahiwatan.
Ginbanta man sang natungdan nga naglab-ot sa 5,000 ka mga indibidwal ang nagtipon sa lugar sa una nga adlaw sang ila rally.
