Nagalaom si Iloilo City Mayor Jerry Treñas nga makaayo ni President Ferdinand Marcos Jr. kag Vice President Sara Duterte ang ila indi pag-intindihanay sa maayo nga paagi.
Sa interview sang Bombo Radyo kay Ms. Joy Fantilaga, spokesperson ni Mayor Treñas, iya ginpahayag nga ang alkalde nagapati nga ang democratic system sang pungsod ang nagahatag sang framework agud ma-address ang mga concerns nga ginaatubang sang duha sa pinakamataas nga opisyal sang gobyerno.
Suno kay Fantilaga, apisar sang nagakalatabo sa national nga bahin, padayon nga nagatrabaho ang alkalde kag nagapakig-angot sa administrasyon agud nga makaimplementar sang mga programa.
Nangin emosyonal man ang alkalde matapos nga nagpabutyag ini sang pagpasalamat sa administrasyon sa pag-ugyon sa iya nga mga plano para sa syudad sa mga nabilin sini nga adlaw bilang alkalde.
Ginhatagan man sang pagtamod ni Treñas ang isa sa pinakadako nga nangin proyekto ni Marcos sa Iloilo nga Jalaur River Multipurpose Project Phase 2.
