Nag-file sang criminal kag administrative complaint si Sangguniang Bayan Member Vincent Pascal De Asis sa Office of the Ombudsman batuk kay Mayor Samuel Gumarin sang Buenavista, Guimaras bangud sa ginapahayag pagbutang sang Local Government Unit sang “Tindahan ng Bayan” sa sulod sang Buenavista Public Market.
Sa interview sang Bombo Radyo kay De Asis, iya ginpahayag nga ang ginabaligya nga mga isda kag utan sang LGU-Buenavista ang yara sa manubo nga presyo kun ipaanggid sa ginabaligya sang mga vendors.
Suno sa SB Member, natukiban niya nga ang mga nagabaligya sa “Tindahan ng Bayan” amo ang mga empleyado man sang munisipyo kag ginagamit man ang salakyan sang LGU.
Ginsiling man ni De Asis nga ang kapital nga gingamit sang Tindahan ng Bayan sa pagbakal sang isda kag utan ang ginaalegar halin sa private funds sang alcalde kag indi halin sa LGU.
Bangud sini, nagsulat ang SB Member kay Mayor Gumarin nga nagapamangkot kun sa diin halin ang pondo nga gingamit sa proyekto kag ang numero sang mga empleyado nga amo ang magbaligya sa Tindahan ng Bayan.
Base sa sulat ni Mayor Gumarin, ang Tindahan ng Bayan ang isa ka exclusifve prerogative sini agud ma-address ang impact sang inflation kag epekto sang El Niño Phenomenon.
Apang pahayag ni SB Member De Asis, wala man lang sang layi ukon ordinansa nga gin-aprubahan ang Sangguniang Bayan sa pag-establisar sang Tindahan ng Bayan kag pagpain sang pondo para sa amo nga programa.
Nagapati ang natungdan nga liable ang alcalde sa Technical Malversation sa idalom sang Revised Penal Code.
